اوکاڑہ (نمائندہ خصوصی) سی آئی اے اوکاڑہ کی انچارج نوریز عباس کی سربراہی میں ایک کامیاب کاروائی کے نتیجے میں ڈکیتی اور راہزنی کے مقدمے میں عرصہ دراز سے مفرور اے کیٹگری کا اشتہاری مجرم محمد عامر گرفتار کر لیا گیا۔
ذرائع کے مطابق، ملزم محمد عامر تھانہ ستیانہ کے مقدمہ نمبر 99/24 تحت دفعہ 392/394 (ڈکیتی اور راہزنی) میں مطلوب تھا اور فیصل آباد پولیس کی طرف سے بھی اس کے خلاف ایف آئی آر درج تھی۔ سی آئی اے ٹیم نے جدید ٹیکنالوجی کو بروئے کار لاتے ہوئے ملزم کو اس کے مخفی مقام سے گرفتار کیا۔
گرفتاری کے بعد سی آئی اے پولیس نے ضابطے کے مطابق کارروائی کرتے ہوئے ملزم کو فیصل آباد پولیس کے حوالے کر دیا۔ ضلع پولیس افسر (ڈی پی او) محمد راشد نے تھانہ سی آئی اے کی ٹیم کو اس کامیاب کاروائی پر شاباش دیتے ہوئے کہا کہ ضلع بھر میں مجرموں کے خلاف کارروائیاں جاری رکھی جائیں گی۔
سی آئی اے انچارج نوریز عباس نے بتایا کہ گرفتار ملزم طویل عرصے سے پولیس سے چھپتا رہا تھا، لیکن جدید ٹیکنالوجی اور معلوماتی نیٹ ورک کی مدد سے اسے کیفر کردار تک پہنچایا گیا ہے۔ انہوں نے عوام سے تعاون کی اپیل کرتے ہوئے کہا کہ اگر کسی کو مشتبہ افراد یا مجرموں کے بارے میں معلومات ہوں تو وہ فوری طور پر پولیس کو اطلاع دیں۔
0 تبصرے